求签记。

星期五晚出咗大良，阿C话我同冷空气一齐登陆，一扫又扫咗一班人出嚟聚餐。结果又遇到阿C个上司，最后佢又争住埋单，我餐饭又请唔成，系未真系有缘得咁利害啊。

星期六，一早又俾阿C拉起身，我去咗医院做面膜，佢同OPEN话要去问签。等我做完面膜都系两个钟头之后嘅事，佢哋竟然仲系度排紧队，超晕。我好想过去睇下系未真系咁神。

去到见到一个小小嘅厅，有一张大神台，供咗好多香，放咗好多水果。中间铺咗张地毯，坐系度嘅应该就系祝姐嘞，旁边跪咗个小男生，周围坐住六七个人。我好好奇啊，阿C话就快到我哋嘞。跟住见到几个人问，好似听故事咁，好得意。

过咗大概半个钟，轮到OPEN嘞，我好认真咁听，觉得好神奇啊，我知道OPEN嘅事，但系有D连阿C都唔知，祝姐竟然讲得好准。本来我心情好轻松，但系听下听下就有D紧张嘞。阿C问完之后，到我嘞。

我照佢教我咁将出生日期同地址写系张红纸上面，祝姐讲咗几句嘢之后就掷圣杯，摇签筒嘞。第一支签终于出咗嚟嘞，祝姐话：前无去路，后有追兵。出入要小心（汗~刚决定去旅行），工作要守旧（继续汗~刚辞职转工作），姻缘仲未有（狂汗~）。晕！使唔使咁恶劣。祝姐问我要唔要求支姻缘签，我话好啊，三年未拍过拖嘞。祝姐望望我，话：靓女，做乜咁失败啊。笑到阿C同OPEN趴地。然后，帮我求咗签，签文话我身边小人好多，困住所以无姻缘，要我拜小人。我屋企都无人识得拜神，祝姐好热心咁写咗佢电话俾我，叫我阿妈唔识就问佢，一定要拜。我接咗张红纸准备起身。祝姐仲话，你三年无姻缘，但系你三年前个段姻缘都系俾人呃，所以一定要拜神，拜完就唔会再有嘢困扰住你嘞。我成个呆咗啊。

哩个世界系未真系有神架呢？

三房两厅

星期日约咗阿C做瑜珈。点知佢临时有约就甩我底，仲话帮我揾咗BACKUP，就系OPEN，点知OPEN都有节目，最后打俾阿好，佢又要陪男朋友番屋企食饭。我都认命嘞，谂住自已系佢屋企睇电视就算。扑到咁赶出大良，佢系楼下交低锁匙俾我就飞奔上车嘞。我系楼下望住一幢幢一模一样嘅楼梯，到底边幢啊？结果凭印象爬咗三幢，都唔系。无奈之下只好打俾OPEN，如果打俾阿C，实俾佢闹死。OPEN凭住佢嘅记忆，话俾我知，我又爬咗两幢，结果到第三幢先揾啱。即系我总共爬咗六个五楼，足足三十层，几乎断气。打开门，电视同电脑都无关，打开个冰箱，大蕃茄小蕃茄，除咗蕃茄仲系蕃茄。C姐，我食乜啊？结果又要落楼买面包，行到双脚都振嘞。

无聊咗一晚，睇睇时间，C姐都系赶唔到番嚟嘞，决定冲凉。刚除好衣服，电话又响，嗱嗱声着番衣服，阿好打电话嚟话佢自己饮醉咗，晕！我仲衣衫不整，阿C又系外边催我开门，又系饮HIGH咗。我俾电话俾佢两个斗HIGH，然后，继续冲凉。

等我冲完凉，佢哋就讲掂数，要去食宵夜，仲YEAH埋OPEN。阿好携眷，阿C食到一半又YEAH咗个男同事过嚟，OPEN食到一半走出去讲电话，一去不返。结果，俾阿乐睇到佢同某男子讲数，佢入嚟讲俾我哋知见到OPEN个男朋友，我同阿C阿好激动咁跑出去，男子系车上，我哋睇唔清。OPEN话佢唔肯落车同见我哋，准备摞包走人。阿C胆大，走去叫佢落车一齐食宵夜。我哋终于见到其庐山真面目。最后全部都一对对，得我一个单吊，郁闷啊。

食完宵夜番到去都成两点嘞，阿C仲好HIGH唔训觉。本来讲好嫁唔出就一起努力买楼，佢成日都讲三房两厅。而家，OPEN拍拖，三房两厅变咗两房两厅嘞。我都训唔着啊。